Промоција на „Документ за унапредување на доброто управување преку изборните програми на локалните избори 2025″

Процесот на децентрализација на власта во Северна Македонија значеше пренесување на овластувања, надлежности и ресурси од централната власт кон општините, со цел поголемо граѓанско учество и поефикасно решавање на локалните проблеми. Но, децении подоцна, општините сè уште се соочуваат со нецелосна децентрализација, непотполна прераспределба на надлежностите и недоволна финансиска независност, што директно се одразува на квалитетот на животот на граѓаните.

Токму преку локалната власт тие најнепосредно ги чувствуваат ефектите на јавните политики, од состојбата на патиштата и чистотата на јавните простори, до квалитетот на воздухот, водата, здравството и образованието. Затоа, ефикасната и одговорна локална самоуправа не е само административна потреба, туку темел на достоинствен живот и доверба во јавните институции.

Токму поради тоа, непосредно пред Локалните избори 2025, на 30 септември Институтот за демократија „Социетас цивилис” – Скопје организираше јавна промоција на ,,Документот за унапредување на доброто управување преку изборните програми на локалните избори 2025”.

Настанот беше наменет за носителите на советничките листи, кандидати за советници и претставници на раководствата на политичките партии и изборните тимови.

Документот е резултат на истражувања спроведени од триесетина граѓански организации во изминатите четири години и опфаќа наоди и препораки од повеќе области на локалното управување: финансиско работење и буџетска дисциплина, урбанизам и градежништво, животна средина, јавни претпријатија и комунални услуги, дигитализација, јавна безбедност и други.

Целта на настанот беше овие препораки да им бидат директно презентирани на идните носители на одлуки на локално ниво, пред да стапат на функција, со очекување дека ќе ги земат предвид при креирањето на своите изборни програми и во понатамошното управување со општините. Појдовна точка на сите препораки е доброто управување и јавниот интерес, со посебен акцент на транспарентноста, отчетноста и отпорноста на корупција.

Овој настан е организиран како дел од проектот „Поттикнување дебата за отчетност и антикорупција“ кој цели да придонесе кон реформски процеси во Северна Македонија преку зајакнување на улогата на Собранието во борбата против корупцијата и креирањето реформи во владеење на правото, овозможувајќи дијалог меѓу партиите и подмладоците, како и меѓу пратениците и граѓанското општество. Проектот е поддржан од Националниот фонд за демократија.