Подмладоците на политичките партии со нови знаења во борбата против корупцијата

Млади политички активисти од три различни партии се собраа во Крушево со една заедничка цел – да научат како да креираат поодговорни и поефикасни политики. На тридневната обука која се одржа од 14 до 16 февруари, организирана од Центарот за добро управување при Институтот за демократија, претставници на подмладоците на ВМРО-ДПМНЕ, Алијанса за Албанците и БЕСА ги продлабочија знаењата за антикорупциските механизми и ја разгледаа состојбата со транспарентноста на локално ниво.

Обуката имаше за цел да ги зајакне капацитетите на партиските подмладоци за креирање политики, со посебен фокус на антикорупциските политики, како и да ги надгради вештините и знаењата на подмладоците за борба против корупцијата. 

Во време кога политичките партии ги креираат своите изборни програми за претстојните локални избори, оваа обука стави посебен акцент на транспарентноста на општините и предизвиците со кои се соочува локалната самоуправа во борбата против корупцијата.

Преку интерактивни вежби и работа во групи, учесниците ги идентификуваа главните проблеми со кои младите се соочуваат во нивните заедници. Анализирајќи ги врските помеѓу овие проблеми и корупцијата, тие разработија конкретни решенија што би можеле да ги застапуваат во иднина како советници или активни членови на нивните партии. Ова беше одлична вежба како увертира за нивното учество во изготвувањето на изборните програми во своите општини.

Ова е шеста од неколкуте предвидени обуки во рамки на проектот „Поттикнување дебата за отчетност и антикорупција“ преку кој Институт за демократија соработува со политичките партии и нивните подмладоци. Целта на проектот е воспоставување јавен дискурс заснован на факти во политичкиот дијалог и стимулирање дискусии за сеопфатни и ефективни антикорупциски заложби.

Проектот е поддржан од Националниот фонд за демократија на САД (National Endowment for Democracy – NED), и цели да придонесе кон реформските процеси во Северна Македонија преку зајакнување на улогата на Собранието во борбата против корупцијата и креирањето реформи во владеењето на правото.

Со оваа обука, младите политички лидери не само што стекнаа нови знаења, туку и направија чекор напред кон создавање поотчетна политичка култура.