Обука за подмладоци на политичките партии: Зајакнување на капацитетите за антикорупциски активности

Институтот за демократија „Социетас Цивилис“ успешно ја реализираше петтата обука за креирање политики и борба против корупцијата, која се одржа од 13 до 15 декември 2024 година во Охрид. Обуката беше наменета за младинските организации на политичките партии, а учесници беа претставници од подмладоците на Социјалдемократскиот сојуз на Македонија (СДСМ) и Демократската унија за интеграција (ДУИ).

Зајакнување на капацитетите на младите политички активисти 

Главната цел на оваа обука е зајакнување на капацитетите на младите политички активисти за препознавање и справување со различните форми на корупција. Преку интерактивни сесии и практични активности, учесниците стекнаа нови знаења и вештини за:

• Анализа на состојбата со транспарентноста и интегритетот на национално и локално ниво;
• Развивање ефективни антикорупциски политики;
• Активно застапување за принципите на интегритет, транспарентност и отчетност во рамките на нивните партии и заедници.

Поттикнување дебата за отчетност и антикорупција

Оваа обука е дел од проектот „Поттикнување дебата за отчетност и антикорупција,“ кој има за цел да внесе факти во јавниот и политичкиот дискурс и да стимулира отворени и конструктивни разговори за борба против корупцијата. Овие обуки претставуваат важен чекор кон изградба на генерација млади политичари што ќе бидат подготвени да се справат со предизвиците на корупцијата и ќе се залагаат за транспарентност и отчетност, како основа за подобро општество.

Проектот е поддржан од Националниот фонд за демократија на САД (National Endowment for Democracy – NED), и цели да придонесе кон реформските процеси во Северна Македонија преку зајакнување на улогата на Собранието во борбата против корупцијата и креирањето реформи во владеењето на правото.