Поглед на Собрание: Перцепциите на граѓаните за работата на Собранието на Република Северна Македонија (2026)

Граѓаните ја оцениле работата на Собранието со просечна оценка 2.7, што претставува благо подобрување во однос на претходните години, но и натаму укажува на умерено ниско ниво на задоволство.

Ова е еден од клучните наоди во анализата на јавно мислење „Поглед на Собрание: Перцепциите на граѓаните за работата на Собранието на Република Северна Македонија (2026)“, објавена од Институтот за демократија „Социетас Цивилис“ – Скопје (ИДСЦС) во рамки на Програмата за парламентарна поддршка (ПСП).“

Анализата ги прикажува ставовите на граѓаните за работата на Собранието, неговата отвореност, надзорната улога, квалитетот на парламентарната дебата и довербата во институцијата.

Истражувањето е спроведено во периодот од 27 февруари до 10 март 2026 година, преку теренска анкета со 1.002 испитаници на целата територија на државата.

Клучни наоди од анализата:

• Граѓаните ја оцениле работата на Собранието со просечна оценка 2.7, што претставува благо подобрување во однос на претходните години, но и понатаму укажува на умерено ниско задоволство.
• Најзапаметени теми од работата на Собранието во 2025 година се надзорната расправа во Постојаната анкетна комисија за заштита на човековите права и слободи, посветена на трагичниот настан во Кочани, како и дискусиите одржани на пленарните и комисиските седници за усвојувањето на Буџетот за 2026 година и ребалансот на Буџетот за 2025 година.
• Перцепцијата кај граѓаните е дека Владата има поголемо влијание врз Собранието отколку што Собранието има ефективна контрола врз извршната власт.
• Граѓаните како најважни функции на Собранието ги препознаваат носењето квалитетни закони, надзорот над Владата и следењето на спроведувањето на законите и политиките, но сметаат дека овие функции се исполнуваат само со умерен успех.
• Повеќе од половина од испитаниците сметаат дека Собранието е недоволно отворено за јавноста, а голем дел од граѓаните не знаат кој е нивниот пратеник и никогаш не контактирале со пратеник.
• Доминира перцепцијата дека пратениците најчесто ги застапуваат сопствените и партиските интереси, додека интересите на граѓаните остануваат во втор план.
• Граѓаните сметаат дека во собраниските дебати преовладува конфронтација наместо соработка, а често се користи и омаловажувачки говор.
• Постои значителна поддршка за формирање повеќе партиски групи во Собранието, особено за прашања поврзани со младите, антикорупцијата, невработеноста и лицата со попреченост.

Прочитајте го истражувањето:
Поглед на Собрание: Перцепциите на граѓаните за работата на Собранието на Република Северна Македонија (2026)

Оваа публикација е изработена во рамките на Програмата за парламентарна поддршка (ПСП), проект на Владата на Швајцарија под покровителство на Собранието на Република Северна Македонија. ПСП ја спроведуваат Националниот демократски институт (НДИ), Институтот за демократија „Социетас цивилис“ – Скопје (ИДСЦС) и Центарот за управување со промени (ЦУП). Искажаните мислења, ставови и содржини не ги отсликуваат ставовите на проектот, донаторот и спроведувачот.