Родова застапеност и тематска видливост: Пратеничките и маргинализираните групи во Собранието

Анализата на родовата застапеност и застапеноста на маргинализираните групи во Собранието на Северна Македонија покажува повеќеслојна динамика. Иако пратеничките сочинуваат 39% од составот, нивната застапеност во работните тела и комисии укажува на тематска сегрегација: тие се повеќе присутни во комисии со социјален карактер, додека пратениците (мажи) доминираат во комисии поврзани со финансии, безбедност, локална самуправа и разузнавање.

Овој тренд го потврдува постоењето на родов пристап за распределба на влијанието и должностите во Собранието, при што се перпетуираат традиционалните родови општествени улоги и во законодавниот дом.

Дополнително, анализата на собраниските дебати покажува дека правата и потребите на маргинализираните групи ретко се застапени, со особено ниска видливост на ЛГБТИ+ заедницата, самохрани родители и жителите на рурални области.

Жените пратенички, иако се во помал број, значително повеќе придонесуваат во дискусиите поврзани со овие категории. Овој наод имплицира дека зголемувањето на родовата застапеност може да има поширок позитивен ефект врз инклузивноста на Собранието, бидејќи жените почесто го носат во политичката агенда гласот на социјално ранливите и недоволно слушнати групи. Истовремено, тоа укажува на потребата од структурна поддршка и механизми кои ќе поттикнат и мажите пратеници да преземат поактивна улога во застапувањето на овие прашања.

Постојат значајни разлики меѓу перцепцијата на јавноста и реалното застапување, што укажува на постоење на перцепциски јаз во оценката на застапеноста на одредени групи. Додека дел од граѓаните сметаат дека одредени заедници – како што се ЛГБТИ+ лицата или лицата со попреченост се соодветно застапени во Собранието, емпириските податоци и анализата на собраниските дискусии покажуваат дека овие групи речиси и да не се појавуваат во законодавниот дискурс.

Овој јаз може да произлегува од недоволната информираност на јавноста за реалните активности на Собранието, од медиумското покривање кое повремено создава впечаток за поголема инклузивност, но и од тоа што
застапеноста често се поистоветува со симболичко, а не суштинско учество во политичките процеси.

Прочитајте ја анализата:
Родова застапеност и тематска видливост: Пратеничките и маргинализираните групи во Собранието