Pёrfaqёsimi gjinor dhe dukshmёria tematike: Deputetet dhe grupet e margjinalizuara nё Kuvend

Analiza e përfaqësimit gjinor dhe përfaqësimi i grupeve të margjinalizuara në Kuvendin e Maqedonisë së Veriut tregon një dinamikë shumë-shtresore. Megjithëse deputetet femra përbëjnë 37% të përbërjes, përfaqësimi
i tyre në trupat punues dhe komisionet tregon ndarjen tematike: ato janë më të pranishme në komisionet me karakter shoqëror, ndërsa deputetët meshkuj dominojnë komisionet në lidhje me financat, sigurinë dhe ekonominë.

Kjo prirje konfirmon ekzistencën e një qasjeje gjinore në shpërndarjen e ndikimit dhe detyrave në Kuvend, ku rolet tradicionale shoqërore gjinore përjetësohen edhe në dhomën ligjvënëse.

Për më tepër, analiza e debateve parlamentare tregon se të drejtat dhe nevojat e grupeve të margjinalizuara përfaqësohen rrallë, me dukshmëri veçanërisht të ulët të komunitetit LGBTI+, prindërve të vetëm dhe banorëve të zonave rurale. Gratë deputete, edhe pse në numër më të vogël, kontribuojnë dukshëm më shumë në diskutimet që lidhen me këto kategori. Ky konstatim nënkupton që rritja e përfaqësimit gjinor mund të ketë një efekt më të gjerë pozitiv në gjithë-përfshirjen e Kuvendit, pasi gratë më shpesh sjellin në agjendën politike zërin
e grupeve të cenueshme sociale dhe të padëgjuara.

Në të njëjtën kohë, kjo sugjeron nevojën për mbështetje strukturore dhe mekanizma që gjithashtu do të inkurajojnë deputetët meshkuj të marrin një rol më aktiv në mbrojtjen e këtyre çështjeve.

Ekzistojnë dallime të konsiderueshme midis perceptimit publik dhe avokimit real, gjë që tregon ekzistencën e një hendeku perceptues në vlerësimin e përfaqësimit të grupeve të caktuara. Ndërsa disa qytetarë besojnë
se komunitete të caktuara – siç janë personat LGBTI+ ose personat me aftësi të kufizuara – përfaqësohen në mënyrë adekuate në Kuvend, të dhënat empirike dhe analiza e diskutimeve parlamentare tregojnë se këto grupe vështirë se shfaqen në diskursin parlamentar. Ky boshllëk mund të burojë nga ndërgjegjësimi i pamjaftueshëm i publikut për aktivitetet aktuale të Kuvendit, nga mbulimi mediatik që herë pas here krijon një përshtypje të gjithë-përfshirjes më të madhe, por edhe nga fakti që përfaqësimi shpesh identifikohet me pjesëmarrje simbolike dhe jo thelbësore në proceset politike.

Pёrfaqёsimi gjinor dhe dukshmёria tematike: Deputetet dhe grupet e margjinalizuara nё Kuvend