Qytetarët e Maqedonisë së Veriut, në më pak se një vit e gjysmë, në tri raste, zgjodhën përfaqësuesit e tyre në Presidencë, në Kuvend dhe në pushtetin lokal. Ajo që për elektoratin përbënte një privilegj demokratik, për institucionet dhe pjesëmarrësit e pavarur në zgjedhje nënkuptonte sfida të reja dhe beteja ligjore. Për vëzhguesit ndërkombëtarë, nga ana tjetër, edhe këto zgjedhje ishin shkak për vërejtje dhe për dërgimin e një sinjali të qartë mbi nevojën për përmirësimin e legjislacionit zgjedhor.
Në dy dekadat e fundit, Kodi Zgjedhor është ndryshuar më shumë se tridhjetë herë. Ky problem u trajtua kohët e fundit nga ish-Kryetari i Komisionit Shtetëror të Zgjedhjeve, Boris Kondarko, i cili pak para zgjedhjeve lokale vuri në dukje nevojën e miratimit të një Kodi zgjedhor krejtësisht të ri, duke theksuar se ligji aktual ka paqartësi dhe pasaktësi që hapin çështje dhe sfida të shumta ligjore.
Edhe pse rekomandimet ndërkombëtare për reformat zgjedhore theksojnë se ato duhet të iniciohen menjëherë pas përfundimit të zgjedhjeve dhe të finalizohen të paktën një vit para ciklit të ardhshëm zgjedhor, praktika maqedonase tregon se ndryshimet më së shpeshti bëhen në mënyrë reaktive dhe drejtpërdrejt para zgjedhjeve.
Kjo mënyrë e ndërhyrjes në legjislacionin zgjedhor është problematike sepse lë hapësirë për boshllëqe të shumta ligjore, të cilat më vonë përbëjnë një sfidë për punën e institucioneve zgjedhore, por edhe për pjesëmarrjen e kandidatëve të pavarur në proceset zgjedhore. Miratimi i nxituar dhe jo-inkluziv i ndryshimeve ligjore e kufizon mundësinë e institucioneve që të përshtaten me kohë dhe të vënë në dukje mangësi ose mospërputhje të mundshme, çka krijon rrezik për gabime gjatë zbatimit të zgjedhjeve. Si rezultat, besimi i publikut dhe legjitimiteti i procesit zgjedhor minohen, ndërsa ndryshimet perceptohen si të pamatura dhe të diktuara nga interesat aktuale politike.
Lexoni dokumentin e plotë më poshtë:
Drejt cikleve më të mira zgjedhore: Propozime për avancim cilësor të legjislacionit zgjedhor
Настани поврзани со проектот
